នាព្រឹកថ្ងៃទី១៥ ខែកញ្ញា ឆ្នាំ២០២៥ នៅភូមិស្រអែមខាងជើង ឃុំស្រអែម ស្រុកជាំក្សាន្ត ខេត្តព្រះវិហារ លោកជំទាវ ឃួន ឃុនឌី លេខាធិកាគណៈកម្មការទី៨ព្រឹទ្ធសភា និងជាអនុប្រធានក្រុមសមាជិកព្រឹទ្ធសភាប្រចាំភូមិភាគទី៨ បានដឹកនាំអតីតសិស្សមិត្តរួមជំនាន់ទី៣ វិទ្យាល័យកំពង់ធំ អញ្ជើញចុះសួរសុខទុក្ខ និងនាំយកគ្រឿងឧបភោគ បរិភោគ និងសម្ភារៈប្រើប្រាស់មួយចំនួន(Power bank ចំនួន១០, ទឹកឃ្មុំចំនួន១២០ដប) ជូនដល់កងទ័ពជួរមុខទិសទី១ ប្រាសាទព្រះវិហារ ចំនួន១៣នាក់ ដែលមកតំណាងកងឯកភាពចំនួន៥ នៅជួរមុខ។ក្នុងឱកាសនោះ លោកជំទាវបានពាំនាំនូវការសាកសួរសុខទុក្ខពីសំណាក់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងថ្នាក់ដឹកនាំព្រឹទ្ធសភា ដែលជានិច្ចកាលសម្តេចតែងតែព្រួយបារម្មណ៍ពីសុខទុក្ខកងកម្លាំងជួរមុខ ដែលបានឈរជើងយ៉ាងរឹងមាំ ដើម្បីការពារបូរណភាពដែនដី។ជាមួយគ្នានេះ លោកជំទាវ សម្តែងនូវគារវកិច្ចគោរពចំពោះវីរភាពអង់អាចក្លាហាន មោះមុតរបស់វីរយុទ្ធជន ដែលបាននិងកំពុងលះបង់កម្លាំងកាយ-ចិត្ត បូជាសាច់ស្រស់ ឈាមស្រស់ ដើម្បីបុព្វហេតុការពារជាតិមាតុភូមិកម្ពុជា ព្រមទាំងបានបួងសួងដល់គុណបុណ្យព្រះរតនៈត្រ័យ គុណកែវទាំងបី សូមតាមអភិបាលប្រោះព្រំ ឃុំគ្រងថែរក្សា និងប្រសិទ្ធពរជ័យជូនដល់វីរកងទ័ពដែលឈរជើងនៅជួរមុខទាំងអស់ នៅតាមព្រំដែន សូមជួបតែសុខសុវត្ថិភាព និងទទួលបានជ័យជម្នះលើសមរភូមិ កម្ចាត់បច្ចាមិត្តឈ្លានពានឱ្យវិនាសអន្តរាយឱ្យខាងតែបាន៕
ប្រភព៖ ជំនួយការលោកជំទាវ ឃួន ឃុនឌី
